उदीरतामवर उत्परास उन्मध्यमाः पितरः सोम्यासः ।
असुं य ईयुरवृका ऋतज्ञास्ते नोऽवन्तु पितरो हवेषु ॥१॥
udīratāmavara utparāsa unmadhyamāḥ pitaraḥ somyāsaḥ |
asuṃ ya īyuravṛkā ṛtajñāste no'vantu pitaro haveṣu ||१||
Udeerataamavara utparaasa unmadhyamaah pitarah somyaasah,
Asum ya eeyuravrikaa ritajnaaste no'vantu pitaro haveshu.१.
इदं पितृभ्यो नमो अस्त्वद्य ये पूर्वासो य उपरास ईयुः ।
ये पार्थिवे रजस्या निषत्ता ये वा नूनं सुवृजनासु विक्षु ॥२॥
idaṃ pitṛbhyo namo astvadya ye pūrvāso ya uparāsa īyuḥ |
ye pārthive rajasyā niṣattā ye vā nūnaṃ suvṛjanāsu vikṣu ||२||
Idam pitribhyo namo astvadya ye poorvaaso ya uparaasa eeyuh,
Ye paarthive rajasyaa nishattaa ye vaa noonam suvrijanaasu vikshu.२.
आहं पितॄन्त्सुविदत्राँ अवित्सि नपातं च विक्रमणं च विष्णोः ।
बर्हिषदो ये स्वधया सुतस्य भजन्त पित्वस्त इहागमिष्ठाः ॥३॥
āhaṃ pitṝntsuvidatrām̐ avitsi napātaṃ ca vikramaṇaṃ ca viṣṇoḥ |
barhiṣado ye svadhayā sutasya bhajanta pitvasta ihāgamiṣṭhāḥ ||३||
Aaham pitrintsuvidatraan avitsi napaatam cha vikramanam cha vishnoh,
Barhishado ye svadhayaa sutasya bhajanta pitvasta ihaagamishthaah.३.
बर्हिषदः पितर ऊत्यर्वागिमा वो हव्या चकृमा जुषध्वम् ।
त आ गतावसा शंतमेनाथा नः शं योररपो दधात ॥४॥
barhiṣadaḥ pitara ūtyarvāgimā vo havyā cakṛmā juṣadhvam |
ta ā gatāvasā śaṃtamenāthā naḥ śaṃ yorarapo dadhāta ||४||
Barhishadah pitara ootyarvaagimaa vo havyaa chakrimaa jushadhvam,
Ta aa gataavasaa shantamenaathaa nah sham yorarapo dadhaata.४.
उपहूताः पितरः सोम्यासो बर्हिष्येषु निधिषु प्रियेषु ।
त आ गमन्तु त इह श्रुवन्त्वधि ब्रुवन्तु तेऽवन्त्वस्मान् ॥५॥
upahūtāḥ pitaraḥ somyāso barhiṣyeṣu nidhiṣu priyeṣu |
ta ā gamantu ta iha śruvantvadhi bruvantu te'vantvasmān ||५||
Upahootaah pitarah somyaaso barhishyeshu nidhishu priyeshu,
Ta aa gamantu ta iha shruvantvadhi bruvantu te'vantvasmaan.५.
आच्या जानु दक्षिणतो निषद्येमं यज्ञमभि गृणीत विश्वे ।
मा हिंसिष्ट पितरः केन चिन्नो यद्व आगः पुरुषता कराम ॥६॥
ācyā jānu dakṣiṇato niṣadyemaṃ yajñamabhi gṛṇīta viśve |
mā hiṃsiṣṭa pitaraḥ kena cinno yadva āgaḥ puruṣatā karāma ||६||
Aachyaa jaanu dakshinato nishadyemam yajnamabhi grineeta vishve,
Maa hinsishta pitarah kena chinno yadva aagah purushataa karaama.६.
आसीनासो अरुणीनामुपस्थे रयिं धत्त दाशुषे मर्त्याय ।
पुत्रेभ्यः पितरस्तस्य वस्वः प्र यच्छत त इहोर्जं दधात ॥७॥
āsīnāso aruṇīnāmupasthe rayiṃ dhatta dāśuṣe martyāya |
putrebhyaḥ pitarastasya vasvaḥ pra yacchata ta ihorjaṃ dadhāta ||७||
Aaseenaaso aruneenaamupasthe rayim dhatta daashushe martyaaya,
Putrebhyah pitarastasya vasvah pra yachchhhata ta ihorjam dadhaata.७.
ये नः पूर्वे पितरः सोम्यासोऽनूहिरे सोमपीथं वसिष्ठाः ।
तेभिर्यमः संरराणो हवींष्युशन्नुशद्भिः प्रतिकाममत्तु ॥८॥
ye naḥ pūrve pitaraḥ somyāso'nūhire somapīthaṃ vasiṣṭhāḥ |
tebhiryamaḥ saṃrarāṇo havīṃṣyuśannuśadbhiḥ pratikāmamattu ||८||
Ye nah poorve pitarah somyaaso'noohire somapeetham vasishthaah,
Tebhiryamah sanraraano haveenshyushannushadbhih pratikaamamattu.८.
ये तातृषुर्देवत्रा जेहमाना होत्राविदः स्तोमतष्टासो अर्कैः ।
आग्ने याहि सुविदत्रेभिरर्वाङ्सत्यैः कव्यैः पितृभिर्घर्मसद्भिः ॥९॥
ye tātṛṣurdevatrā jehamānā hotrāvidaḥ stomataṣṭāso arkaiḥ |
āgne yāhi suvidatrebhirarvāṅsatyaiḥ kavyaiḥ pitṛbhirgharmasadbhiḥ ||९||
Ye taatrishurdevatraa jehamaanaa hotraavidah stomatashtaaso arkaih,
Aagne yaahi suvidatrebhirarvaansatyaih kavyaih pitribhirgharmasadbhih.९.
ये सत्यासो हविरदो हविष्पा इन्द्रेण देवैः सरथं दधानाः ।
आग्ने याहि सहस्रं देववन्दैः परैः पूर्वैः पितृभिर्घर्मसद्भिः ॥१०॥
ye satyāso havirado haviṣpā indreṇa devaiḥ sarathaṃ dadhānāḥ |
āgne yāhi sahasraṃ devavandaiḥ paraiḥ pūrvaiḥ pitṛbhirgharmasadbhiḥ ||१०||
Ye satyaaso havirado havishpaa indrena devaih saratham dadhaanaah,
Aagne yaahi sahasram devavandaih paraih poorvaih pitribhirgharmasadbhih.१०.
अग्निष्वात्ताः पितर एह गच्छत सदःसदः सदत सुप्रणीतयः ।
अत्ता हवींषि प्रयतानि बर्हिष्यथा रयिं सर्ववीरं दधातन ॥११॥
agniṣvāttāḥ pitara eha gacchata sadaḥsadaḥ sadata supraṇītayaḥ |
attā havīṃṣi prayatāni barhiṣyathā rayiṃ sarvavīraṃ dadhātana ||११||
Agnishvaattaah pitara eha gachchhhata sadahsadah sadata supraneetayah,
Attaa haveenshi prayataani barhishyathaa rayim sarvaveeram dadhaatana.११.
त्वमग्न ईळितो जातवेदोऽवाड्ढव्यानि सुरभीणि कृत्वी ।
प्रादाः पितृभ्यः स्वधया ते अक्षन्नद्धि त्वं देव प्रयता हवींषि ॥१२॥
tvamagna īḷito jātavedo'vāḍḍhavyāni surabhīṇi kṛtvī |
prādāḥ pitṛbhyaḥ svadhayā te akṣannaddhi tvaṃ deva prayatā havīṃṣi ||१२||
Tvamagna eelito jaatavedo'vaaddhavyaani surabheeni kritvee,
Praadaah pitribhyah svadhayaa te akshannaddhi tvam deva prayataa haveenshi.१२.
ये चेह पितरो ये च नेह याँश्च विद्म याँ उ च न प्रविद्म ।
त्वं वेत्थ यति ते जातवेदः स्वधाभिर्यज्ञं सुकृतं जुषस्व ॥१३॥
ye ceha pitaro ye ca neha yām̐śca vidma yām̐ u ca na pravidma |
tvaṃ vettha yati te jātavedaḥ svadhābhiryajñaṃ sukṛtaṃ juṣasva ||१३||
Ye cheha pitaro ye cha neha yaanshcha vidma yaan u cha na pravidma,
Tvam vettha yati te jaatavedah svadhaabhiryajnam sukritam jushasva.१३.
ये अग्निदग्धा ये अनग्निदग्धा मध्ये दिवः स्वधया मादयन्ते ।
तेभिः स्वराळसुनीतिमेतां यथावशं तन्वं कल्पयस्व ॥१४॥
ye agnidagdhā ye anagnidagdhā madhye divaḥ svadhayā mādayante |
tebhiḥ svarāḷasunītimetāṃ yathāvaśaṃ tanvaṃ kalpayasva ||१४||
Ye agnidagdhaa ye anagnidagdhaa madhye divah svadhayaa maadayante,
Tebhih svaraalasuneetimetaam yathaavasham tanvam kalpayasva.१४.
उच्चारण मार्गदर्शन: यह वैदिक सूक्त है। यहाँ पाठ बिना स्वर-चिह्नों के दिया है; उदात्त-अनुदात्त-स्वरित के साथ सस्वर पाठ परंपरा में गुरु से ही सीखा जाता है। "पितॄन्" में दीर्घ ॠ, "स्वराळ्" में वैदिक ळ, और "सुविदत्राँ", "याँश्च" में अनुनासिक (चंद्रबिंदु) स्पष्ट रखें। जो सस्वर पाठ न जानते हों, वे अर्थ समझते हुए शांत, स्पष्ट पाठ या श्रवण करें।
